الأولمـــــــــــــــــــــــــــــــــــــب

للإبداع الأدبي الحقيقي بحثا عن متعة المغامرة
 
الرئيسيةالبوابةاليوميةمكتبة الصورس .و .جالأعضاءالمجموعاتبحـثالتسجيلدخول

شاطر | 
 

 ديوان (حاجات ياما) للشاعر سعيد شحاتة

اذهب الى الأسفل 
كاتب الموضوعرسالة
Admin
Admin
Admin
avatar

ذكر عدد الرسائل : 39
العمر : 47
تاريخ التسجيل : 14/04/2007

مُساهمةموضوع: ديوان (حاجات ياما) للشاعر سعيد شحاتة   26/5/2007, 18:25

حاجات يامه

____________________

ديوانى الأول صدر عن الهيئة العامة لقصور الثقافة

________________________

الإهداء


اليهما . قلب أمى وروح أبى

اليه . سيدى الوطن

اليها . منية المرشد مؤنستى فى هذا الليل العنكبوتى

الى

سيدتى

أصدقائى

وحرف السين الذى تقدم اسمى فأرهق صديقى صاحب السنة الفضية
[color=blue]

[color=blue]كلمة

__________

ان الله أعطانى التاج

فالويل لمن يمسه

نابليون
[center][color=blue]1/ تحية القلب

_________

بنظرة عينك الحلوة

وصلت الشط

طلعت نشفت جواكى

وجوة الوردة حطيتك مكان ما انحط

وقلبى عملته مرساكى

وعلمتينى بعيونك افك الخط

رسمت طريقى وياكى

وغنى القلب غنوة بلحن متقطع

ومعنى الغوة دنياكى

لقيت قمراية جوة الوردة ما بتسطع

لأن العطر غطاكى

وبإسم الشمس سميتك

وباسم حياتى سميتك

وباسم الآهة والتنهيد

وبعد الرب والتوحيد

ف قلب الوردة حطيتك

وغطيتك

برمش عيونى غطيتك

وخبيتك

ونمتى ف قلبى خليتك

وقام القلب حياكى

وصلالك صلاة الحب

وحياكى

وصلالك صلاة الدم

وحياكى

وعمره ما حيا خال ولا عم

وقال لازم أصوم لى يومين

فى عيد الأم

__________
[center][color=blue]2/ حاجات يامه

_____________


بنتغرب
وحضن الشمس يتدارى ف خطاوينا
ونتقابل
نبص لبعضنا حبة ونتصعب
عشان كدبة قالوها اتنين

ما عشقوش بعض زيينا
وأعيش فاكرك
وراسم بين رموش العين ملامح كدبة هدامة
وتنسينى برغم انك

ما زلتى بتعشقى فيا حاجات يامه
كلام الشعر والتنكيت

وغنوة تمللى أغنيها لثومة ف فيلم سلامة
حاجات يامة
سجايرى الفرط لما أكتب نكت سكة
وضحكك لما بستأذن ولما تقولى رايح فين

وأقول هفتح بلاد عكا
وجيبى اللى اتزرع جواه شوية قرشينات فكة
وقلبى اللى اترسم بسمك على الحيطة وع الدكة
وضحكة تمللى أطلعها وأخبيها
وأخاف يسرقها ديب واقف

بيسرق ضحكة العشاق على السكة
وشخبطتى على الكلمة
وخوفنا من الفيران فى الغيط

ومن حواديتنا فى الضلمة
ومن شكى ما بين الرسم جوا ملامحك النيلى

وبين لونى
ومن بصة عنيكى السودا لعيونى
وتنهيدك وتنهيدى
ووقفة شعرى لحظة ايدك المرمر ..
..ما تلمس ف الهوا ايدى
وهزة شفتى يمك
وهزة شفتك يمى ولا همك
كلام الناس هيجرحنا ..هيدبحنا ..
.تقولى ان أنتى شريانى وأنا دمك
ومش بدرى ولا بتدرى
ورعشة جسمى

[color:492a=#0000ff:492a]لما يمروا كفينك على صدرى
ونتكلم كلام يمكن ما نفهمهوش
وكلمة تجر ميت حدوتة وحكاية
وأنا بين النجوم والورد تايه فيكى يا آية
ومحتار فى السنين بالطول
ودايخ فى الساعات بالعرض
وأقيم لك فى الصلا يمكن
تؤمينى ...تضمينى ...
تخلينى

[color:492a=#0000ff:492a]أحس ان الصلا (ف) حضنك عليا فرض
وبسأل نفسى معقوله تكونى زينا (م ) الأرض ؟
ولو كنتى
سمانا دى سما لينا

[color:492a=#0000ff:492a]ولكن فوق ضفيرتينك سما وبجد
تايه فيكى يا آية
سمانا دى عشان خاطرك سما مراية
وأنام حبة تهزينى
أفوق ماسك كتاب فى الشعر والتانى كتاب دينى
وقدامنا كتاب صاحبه ما هوش عارف
يفرق يعنى ايه عالمة وعلامة
ونقراه ننفجر (م )الضحك أحس انك
ما زلتى بتعشقى فيا حاجات يامه
تبصيلى ونتنهد ...ونتكى على ايدينا
تتوهى ف حضنى أتوه فيكى

[color:492a=#0000ff:492a]ونتدارى ف بعضينا
[/center]
[/center]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://alolymp.niceboard.com
Admin
Admin
Admin
avatar

ذكر عدد الرسائل : 39
العمر : 47
تاريخ التسجيل : 14/04/2007

مُساهمةموضوع: رد: ديوان (حاجات ياما) للشاعر سعيد شحاتة   26/5/2007, 18:26

3/ حابى

___________

حابى اتقتل

خبر الفجيعة ملى الجرايد والبيوت

والنخل زعق فى السما

حابى اتقتل وازاى يموت؟

كل البلد لمت دموعها ف كمها

والحزن باس الخضرة بسنانه الغبية

وضمها

عاود يعلق فى الرقاب طوقه الحديد

والناس مشت فى الليل تخبط فوق بيبان الأوليا

يمكن يحنو وحابى ينطق من جديد

والعيد وصل لبلدنا لكن رجعوه

وقالولوا فوت بعدين علينا يا عم عيد

رفرف جناحه وعبى فرحه ف مخلته

وكتب على جدور النخيل من قبل اعلان هجرته

لازم هييجى اليوم وأعود

جايز يبص لكم نهار

ورحل وسابالقلب بين أحزان ونار

وجريت أدور فى البلد مش لاقى دار

مش لاقى غيرحبة حزانى مدمعين

عيطت لكن م الفرح

فرحان بدمعك يابلد وقت الهزيمة ولنكسار

فرحان عشان هنكون أكيد

تحت العلم ايد حاضنة إيد

واحدة بتطلع م الشمال

والتانية جاية من الصعيد

فرحان وهمك يا بلدنا عنكبوت

داير بينسج ف الخيوط

وآتون كبيرنا بيترعش

حابى اتقتل وإزاى يموت؟

فبعت مكتوب السكات

قلت الوطن كان يوم ومات

سمعت كلامى الأهرامات

خوفو انتبه من غفوته

وطلع وأعلن كلمته

وصرخ بصوت كل البلد

جرد سلاحك يا ولد

وأرفض من الغربال تفوت

جردت سيفى بفرحتى

ومشيت أغنى لدولتى

لازم هتتحل القيود

حابى اتنفض جوا التابوت

وطلع وردد عنوتى

ووراها كام موال طويل

وصرخ بصوت كل البلد

يا شعب مش لازم تميل

وان ملت يوم البس ملس

واياك تقول انت ابن نيل

________________________________________________

4/ حلم

_________

على مرايتك

رسمت الوش دا نوبتين

فى وبة اسمى البطل رستم

ونوبة اسمى علاء الدين

على دراعك بنام وأحلم

وأشوف رستم بيندهلى

أخش ف هيكل الفارس على مهلى

بزعق فى البلد وباصيح

وبركب فوق حصان الريح

وأطيح فى لجاى والرواح

وأقول رستم رجع تانى

ينشف دمعة النواح

فى جوف الحرب أكون بركان

بداوى الروس بسيف مخصوص

مصنع من سنان الجان

ورمحى بسنه جوه الصدر يتمدد

بلا استئذان

ولما الحزن دق الباب

رفعت السيف على الآخر

عشان يسكن حشا زهراب

نجوم الكون وشمس الكون

وكل الكون صبح سكتم

وكسرى لوحده بيشجع

يعيش رستم

صحيت من نومى بتألم

لقيت الدمع متنتور على الخدين

ونمت اتشكلت صورتى

ف علاء الدين

على جبينى النجوم مالت

وقدام القمر حدد طريق سواح

صباعى اتحط فيه خاتم

ولكن راح

وشفت الدنيا مقفوله بغيامة وسد

سألت الناس عن العتمة وما حدش رد

جريت فى الشارع المهجور

سمعت الشمس ماسكة الناى

وبتدندن ف ريح السور

شافتنى اتقيدت رجلى بخيوط النور

قالتلى اسمك علاءالدين

ومدت نحيتى الكفين

على الأول قريت اسمى

وع التانى لقيت مصباح

قالتلى اسمك هيفضل وشم ف دراعى

ومصباحك

دا فيه خادم ومش ساعى

ولما هيندعك طبعا

أكيد هيبان لك الداعى

فخدته وشفت قدامى الطريق مفتوح

وسلمت الجسد للريح

وخايف أبوح

لقيتنى جريت

ولما وصلت يم البيت

وقفت ف ركن فى الشارع

وع المصباح فضلت أدعك

لقيت دخان كتير طالع

ولكن كان وراه عفريت

صرخت وقمت من نومى

بقيت متخبى ف هدومى

سألت بصوت ضعيف ازاى

يكون جوا الفانوس عفريت

وليه رستم قتل زهراب

مع ان الدم مش ممكن

يكون ديناميت ؟؟!

ولما أمايه شدتنى

سألت سؤالى من تانى

ندهت بصوت طلع جامد

سألت أمايه عن اسمى

قالت لى اسمك

سعـــــــــــــــــيد حامد
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://alolymp.niceboard.com
Admin
Admin
Admin
avatar

ذكر عدد الرسائل : 39
العمر : 47
تاريخ التسجيل : 14/04/2007

مُساهمةموضوع: رد: ديوان (حاجات ياما) للشاعر سعيد شحاتة   26/5/2007, 18:29

5/ طاولة

___________ هذه القصيدة حذف نصفها من قبل أحد مشرفى الاصدارات بمحافظة كفر الشيخ وبعد خروج الديوان للنور صدمت بهذا الخبر

فابتسم قائلا _ حتى نعطى مساحة للقصائد الأخرى

_يا صديقى لقد فقدت معناها

_ يا خى ما يهمش سهله

((يا دين النبى الناس دى بتفكر ازاى))

القصيدة كما نشرت

____________________________

بنتسابق

عشان نوصل لأول بيت قصيدة حب

تنهد البيوت فوقنا

ونرمح فى السنين ونجور

يجوز نحضن بلاد النور

نلاقى العتمة جوا الدور

بتستنانا تخنقنا

نخاف ونرد نتعاتب

ونتكاتب

نلا قى الحزن والمكاتيب بتدبحنا

ونتراسل

نقول يمكن بريد الصبح يسمع شكوة المجاريح

ويبعت حل ويا الريح يريحنا

نروح نحضن رايات الصبح تلقانا

ونتمسكن تقول فاكرين

نقول دايما يا فاكرانا

ونلقى ف حضنها الطيب مطارحنا

نتوه جوانا نتألم

وتتبخر دموع نوحنا

تكون ع القمر سحباية وتمطر

تخضر كل شئ ف الكون وتجرحنا

ولما الجرح يوجع حلمنا النعسان

نقوم ما ننام

لنحلم جوا نومنا بخوف على خوفنا

يجرد سيفه والمرادى ينسفنا

نخاف نضحك

ولما نعوز بنتتاوب

ونتدارى ف ملامحنا

وروحنا تقوم بسيف مهموم وتحمينا

وتفرد جوا أوتار الألم تفاريح تغطينا

ونتفابل على بداية شعاع الشمس

نعمل م القلوب مينا

حبيبة قلبى أنا العاشق

وأنا الراشق

فى صدرى سهامى وسهامك

وكل سيوف أهالينا

وأنا المجنون

ونون بس القلم يكتب حكاوينا

وأنا ف وقت الغارات عنتر

ووقت الوحدة أكون مينا

...................

.......................

..........................

بناءا على رغبة موظفى النشر نكتفى بهذا القدر من القصيدة
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://alolymp.niceboard.com
Admin
Admin
Admin
avatar

ذكر عدد الرسائل : 39
العمر : 47
تاريخ التسجيل : 14/04/2007

مُساهمةموضوع: رد: ديوان (حاجات ياما) للشاعر سعيد شحاتة   26/5/2007, 18:31

6/قالوا السلام

_____________________

قالوا السلام

يا عندليب

كب الغناوى ف مخلتك

زرغت فى عبك والفرح

خبيه فى يا قة بدلتك

بان للسلام العينة

فابدأتصحصح من هنا

متعودين نسمع تمللى

وع الرصيف نقعد عشان نهضم بفنجان صبرنا

يا عمنا الشيخ الولى

جاتلك أوامر من عل

فاوعك تغالط واقرا فوق روح العباد

سورة(( المسد والبينة))

اياك تعيط ع البشر

لعلع بحسك

خلى صوتك

جوا أركان الكنايس والجوامع يتنشر

لخلعنا من حضن الضنا

...........................

يا عندليب ما تخافش

واصرخ فى الخلا

جوانا بتهز الصمود (( الزلزلة ))

لكن بجد المهزلة

ان احنا وقت الهلث

جدعان بالقوى

لكن ساعات المرجلة

نتخبى جوا قزايز الخمرة القديمة

ونتحشر

.............................

يا عندليب

يمكن يكون جوانا حاجة اتبدلت

لما القدام جم يعدلوها

اتقندلت

خلت فى جتتنا المشاعر تتحرق

نيمت روحك ع الجليد

وسترت نفسك بالورق

واحناا اللى بالليل والنهار

م النار مخططنا العرق

دايرين نطيب فى الجرايح بالجدل

وما فيش مقابل أو بدل

دايرين نواسى ف نفسنا

ولما الغريب يسأل نقول اتعدلت

طب ايه فى قصتنا اتعدل؟؟؟!

....................................

يا عندليب

رتل على ارواح العباد

واوعك لسانك يتأسر

قالوا السلام هوا الأمل

لكن السلام حضنوه فلنكات القضيب

والقطر داس

ريحه اتعصر

نبت ف ريح السكة عود

الدرة نام فوقه اتكسر

وان حد فيهم قال عهود

فخلاص معاهداتنا انتهت

دا الدم لبيض بين عروقهم كان زماااان

لكن بهت

بصراحة ممزوجة بعبط

كلمة سلام جوا القاموس

صبحت جاسوس محطوط غلط

والحق مش ممكن يموت

وان مات نصحوه بالزلط

............................

يا عمنا الشيخ عندليب

ما فيناش هرب

قوم صحى جوانا الحقيقة

وصحى جواك الطرب

دا احنا البنات المصلوبين

واحنا الولاد المقتولين

واحنا اللى بين الخلق

سمونا العرب

........................

يا عندليب

صحصح بلادك بالغنا

ولفلف على اكتافنا العلم

أمريكا بنت الكلب

لابسة التاج ألم

عاملة الكبيرة بخط سنك يا قلم

وأنت اللى نايب عننا

قول للحبيبة

ان السلاح شايلين ذخيرته ف قلبنا

قول للحبيبة

اوعك تخافى من الوجع
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://alolymp.niceboard.com
Admin
Admin
Admin
avatar

ذكر عدد الرسائل : 39
العمر : 47
تاريخ التسجيل : 14/04/2007

مُساهمةموضوع: رد: ديوان (حاجات ياما) للشاعر سعيد شحاتة   26/5/2007, 18:32

بتقولى ايه ؟

سامعك طشاش

يا خلق هوه استحملوا

أم الضفاير مفرودين

بتقول بصوت مخنوق كما صوت البجع

قوم يا وليدى اللى اتقتل

واستنى يوم موت أمتك

عساف رجع

مش مشكلة

اوعك تخاف يوم يا بطل

وايه يعنى عساف يا جدع

يمكن يكون برميل زبالة معلبة

يمكن يكون بلاص قديم

أو محلبة

مصنوع بايد ناسها اللئيمة المجرمة

بس الأكيد واللى أعرفه

عساف برام صنعوه يزود لبرمة

يا خلق هوه اتأملوا

أم الضفاير مفرودين بتقول لى قال

عساف بشر

طاب يعنى ايه كلمة بشر يا معلمة؟

عساف سنانه من الكنال متطرمة

وودانه يومها الطيارات

شدوها مدت فى السما

وعنيه فى بعض اتخبطوا

واتلخبطوا

ما بقاش يميز بين جمل أو نمنمة

منخيره حطوها ف قفاه

لما انصدم فى قطور طره

شره اتحلق

زحلق حواجبينه لوره

شنباته دقنه ف قلب حلقه اتمددوا

وشفايفه للبربخ ما بينهم حددوا

واقفين عليه حارس وحامى للحمى

..............................

يا مسلمة

عصر الطيور راح وانتهى

عساف كلينتون جورج بوش

كلك كمالة لأبرهة

المعجزات راحت

وموسى اتكسرت منه العصا

وما نعرفوش مين لبى أمرك يا وطن

أو مين عصى

ما بقاش فى حجرك يا بلد

غير حبة الطوب والحصى

يا تصممى

وتعممى ولادك بلاسة دمهم

يا تكبى طوبك ع الرصيف وتنامى تانى ف حجرهم

تتهجى فى الفزع المريب

يا عندليب

بالليل بيدبحنا العياط

شوف زرعنا

من دمعنا اتفرفط ونبت ع البلاط

والحزن جوانا اتنقر

يا عندليب

شايف حصان قلبك زقر

ما تخافش دول حبة تيران

متشعبطين فى ديول بقر

حبة ناموس داير يمصمص دمنا

يا أمنا

الليل فرد دراعاته ع الضفات ونام

يا مؤمنة

واستوطظنت فيكى الجراح المزمنة

يا حبل شدوه وانفرط

ويا بقية عقدنا

..........................

يا عندليب

نفسى ابتدى لك فى الحكاية

بدايتى فين

هوصف مائير

عساف شارون وباراك

وكلك بنيامين

عاوزين سلام

جايين وحاطين السلاح ريح صدرنا

رابطيننا فى اوتادهم

وفاتلين الروايس دقننا

ومنيمين كل البلاد جوا التابوت

ومغميين كل الخلايق بالسكوت

..................................

جايين وطالبين السلام وما فيش حداهم

شئ ينوه للتقى

فاعلن على جموع العرب

نعس السلام ويا الكلاب

والوقت وقت البندقة
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://alolymp.niceboard.com
Admin
Admin
Admin
avatar

ذكر عدد الرسائل : 39
العمر : 47
تاريخ التسجيل : 14/04/2007

مُساهمةموضوع: رد: ديوان (حاجات ياما) للشاعر سعيد شحاتة   26/5/2007, 18:33

7/ عيون المشربية

[color=blue]

___________

مدخل.

ــــــــــــــ

متبعترة الغنوة الحزينة

ما بيننا ليه متبعترة؟

وعنيكى نايمين جوا صدرى

وقلبى عاملاه مندرة

خطاويكى مش زى الخطاوى المعروفين

خطاويكى تتقاس يا حبيبتى بمسطرة

...............................................................

يا جناب القاضى تسمح

بعد اذنك

والنبى تدينى مهلة

أصرخ وأفضفض ع اللى بيه

وأحكى عن ظلم الحبايب

يا جناب القاضى ليه

اسمع الحدوتة منى

وخدلى بالك

بعدها قول لى يا أفندم ما بدالك

قبل ما تحكم عليا

العيون كانت صلاتى ومعبدى

والرموش كانت هدومى

والدراع كان مسندى

وابتسامتها دى كانت صبح طالل

والدموع كانت دموع المغربية

لما كنا ولاد بنحبى

كنت بعشق فيها نفسى

كنت بعشق فيها نبضى

وضحكتى وشمسى اللى جايه

واللى خباها بتعاويذ الألم فى الماضى أمسى

كنت بعشق فيها نور الشمعة فى الليلة الكئيبة

كنت بعشق عندها لما تقع

وتقوم على طراطيف ايديها

كنت بعشق فيها ضحكتها الغريبة

يا جناب القاضى فعلا

قبل ما كنا بنعرف

يعنى ايه كلمة أنوثة

يعنى ايه كلمة رجولة

كنا دايما

نبنى فوق الرمل أحلام الطفولة

كانت الأحلام نغم وغناوى يامة

وأما كان الموج يعافر ع الأماكن

كنا نرجع تانى نبنيها ولكن

يتبنى ف رحها ربيع جنب ابتسامة

ابتسامة طفل راجل

كان ف ريح طفلة صبية

شاف فى نفسه النيل وشافها أحلى ميه

كنا نلعب

لما نعرق

بس ما كناش بنعرف

يعنى ايه طوبة وبؤونة

كنا نلعب بالتقل حبه

وحبه بطوحينا يا لمونه

كنت بندها تمللى بديدمونة

كنت لما أرفع فى وش البحر سيفى

كات بتعمل ايدها نبله

كنت أنا عنتر وكانت هيا عبله

وأما أصبحنا كيان واحد مجسد

وأما حسيت ان انا فيها

وحسيت بيها فيا

شفتها بتقول لى عندك

يا ياسين أنا مش بهية

يا جناب القاضى فى اللحظادى

حسيت انى وحدى

[color:8a31=blue:8a31]واللى قاتلانى عيون المشربية
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://alolymp.niceboard.com
Admin
Admin
Admin
avatar

ذكر عدد الرسائل : 39
العمر : 47
تاريخ التسجيل : 14/04/2007

مُساهمةموضوع: رد: ديوان (حاجات ياما) للشاعر سعيد شحاتة   26/5/2007, 18:35

[color=blue]8/اعلان نهار


______________________


[color:81c8=blue:81c8]اعلان نهار
[color=#2c305e]___________

بعد الشعاع اللى انكسر فى البحر

مستنى الشروق

واقف فى قلب الخوف وداير باأترعش

والحزن غرقان جوا نيل القلب

مرة بيفترى

ومرات يروق

والفجر بدل ميته وخلاها يود

والبحر مش عاوز يعود

يا عم صبح اضحك بقة

وشقشق ودوق

طعم السنين ملح كما توب الغجر

والليل حجر

رعرع فى قلبى الخوف شجر

وطلع يفرع عود ألم من جدر عود

يا صبح علمتك

بنجمتك الأبية المتدارية الخايفة من صوت البارود

شمسك ما بينها وبين رموشى سفر طويل

فاردة على كتفك غيوم المستحيل

ومخبيالى ف صدرها المليار شعاع

وريقها باين فى العدم

من باع ندم ملضوم فى باع

وأنا واد مراكبى وبا أترعش

وأنت اللى مش عاوز تعود

والغزل بين كفينى داير يعترض

شايل مابين بوصه احتجاجه على الصمود

يا عم صبح اضحك بقى

وميل وجود

وانفض غبارك واترسم

وافتح سنانك مرة حاول تبتسم

دأنا بين عيون صاحبى الشبك

شفت الحبك

ميل على جدر الكافور

بيقول له فوق

والديك لاقيته بيستربع ع الجدار

ميلت وشى ليمتك

شفتك بتكتب كلمتك

إعلان نهار

من بين جبال النار طلع

من بين آلام الناس طلع

من بين تجاعيد البحار

مدد ضفاير شمسه للكون وابتسم يم السنين

رشرش على كل البشر برفان حنين

ناول جبال التلج كرباج السخونة

وخلى عم الشيخ بؤونة عصر لمونة

على القلوب الحزنانين

وقعد يطول يا الحبيب

فى خيال بيوتنا اللى اتعدم

ويغنى غنوايتك بألحان الندم

ينسج فى عش العصفرات اللى اتهدم

علشان يساعد بيها كل المحتاجين

والعصر لما بدأ يبان

لم النهار

شعر الضفيرة

اللى اتفرد م الشمس

فوق وش السطوح

وزعل ودمع دمعتين

وبدأ يبوح

وصرح وقال وبصوت مرار

يا اخواننا

جودباى

[color:81c8=#2c305e:81c8]بونسوار


سابنا وفات


زى الألم


لما بيحضن فى السكات


زى القلم لما بيسقع فى الشتا


زى الولد لما بيصرخ


وأمه تاخد من ايديه غزل البنات


أصل النهار بيخاف مع الفقرا يبات


وأما يكلمهم بيتكلم لغات


(( عدى النهار ))


قبل الغناوى ما تنقسم


لكنه قبل فراقه ما يكون اتحسم


ميل وقال لى بصوت حزين


يا حبيبى لازم تبتسم


رديت بصوت مليان أنين


ازاى يا صاحبى هنبتسم


وعيون بلدنا مدمعين
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://alolymp.niceboard.com
Admin
Admin
Admin
avatar

ذكر عدد الرسائل : 39
العمر : 47
تاريخ التسجيل : 14/04/2007

مُساهمةموضوع: رد: ديوان (حاجات ياما) للشاعر سعيد شحاتة   26/5/2007, 18:36

09/حبة فرافير

فوق من أرض بلدنا الطاهرة

قعدوا الفرافير عاملين سهرة

رفعوا شعار المونت كريستو

واحد دانتى

وواحد مانتى

وواحد عامل فيها خريستو

حدوتة ف مليون حدوتة

وكانوا تلاتة براس منافيستو

كان يوم جمعة

وكانوا ف رحلة

وكات الرحلة دى رحلة صيد

رحلة صيد فعلا جبارة

كانوا قاعدين على شط البانيو

وماسكين ف ايدهم سنارة

وأما ايديهم م الصيد تعبت

قاموا وقالوا نروح خمارة

رد خريستو وقال مش ممكن

أصل أنا عندى ميعاد مع مذة

دانتى ندهله وقال له تعالى

هناكل مذه

قال له راح أتعب

رد التانى بفكرة خطيرة

قال له تعالى يا عم خريستو

ومش راح ناكل مذة كتيرة

قال له ضوافرى هتتعب جدا

قال له اغسلها بزيت زيتون

دخلوا وصفر دانتى بصوبعه

وجا الجرسون

قال طلبات المحترمين

ردوا بصوت واضح وملعلع

هات ينسون

ضحك الراجل جامد جدا

كان مستغرب

حاجة غريبة صحيح يا جماعة

دا جاى خمارة يقول ينسون

حاجة تضايق فعلا جدا

بل وتخللى العقل يطير

أما صحيح عالم منخوليا

باين دول حبة فرافير

دانتى ما بصش يم الراجل يسمع حوستو

لكن بص ليم خريستو

قال له بصوت طالع متقطع

صوت مراويش

ايه راح يحصل

لو طلبونا نخش الجيش ؟؟

مانتى اتلفت

رد بصوت مبحوح ومزفت

صوت وكأنه ف قلب الحرب

نمسك أعدائنا نقطعهم

ننزل فيهم عض وضرب

رد كبيرهم بابا خريستو وقال له اتخيل

دانتى نده وزعق واتخلقن

هجرى ليم عدوى وأقول له

بصوت مش باين

خاين .......... خاين ...... خاين ........خاين

ييجى متهور

يخبط راسه ف أقرب زلطة يقوم متعور

ينزل ميت

رد خريستوا وقال له عفارم

وأنت هتعمل ماذا يا مانتى

مانتى اتنرفذ

قال راح أشيل حجراية كبيرة

ولما يقرب أقول له استنى

يفضل واقف حبة بحبة

وأجرى وأنط وأروح قدامه

وأكون تبة

وأقعد أطلع بره لسانى

يقرف منى

يجرى وراية عشان يقتلنى

يقوم متكعبل

ينزل فوق الأرض مدغدغ

رد خريستو وقال مش ممكن

دانتى ومانتى ولاد جنيه

كل خططكو بجد زكية

دانتى ومانتى بصوت متوحد

وأنت هتعمل ايه يا خريستو

قال أياى

دأنا هعمل يامه

هلبس شورت

وهلبس جزمة

وهلبس فوق م الجزمة بجامة

هدخل قلب الحرب بكورة

وهرسم فوق الكورة زتونة ف بق حمامة

وأما يجينى صاحبنا التانى

هخليه يرمى سلاحه ويلعب

وأفضل أقشه و أتف ف وشه

وأما يدوخ برضه أنا مش هسكت

هفضل أقشه وأتف ف وشه

ييجى مسلم عيشه لملحى

وأبقى كسبت الحرب لصالحى

ايه رأيكو يا ولاد زهارير؟

صفر دانتى

وسقف مانتى

ورد خريستو على الجماهير

صرخ الجرسون فى الخمارة وقال يا بلادى يا كلمة خير

عمرك يوم ما تشدى حزامك

طول ما فى حاجة اسمها فرافير
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://alolymp.niceboard.com
حمدي علي الدين
المدير
المدير
avatar

ذكر عدد الرسائل : 1252
تاريخ التسجيل : 15/04/2007

مُساهمةموضوع: رد: ديوان (حاجات ياما) للشاعر سعيد شحاتة   26/5/2007, 19:02

هذا ديوان الشاعر سعيد شحاتة قد تم تثبيته هنا ، وأوجه النداء كواحد من إدارة منتدى الأولمب إلى كل من لديه إصدار أن يقوم بنشره هنا في هذا الركن وسنقوم بتثبيته

وشكرا لكم جميعا
مودتي
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
سعيد شحاتة
مشرف مؤسس
مشرف مؤسس
avatar

ذكر عدد الرسائل : 665
العمر : 39
تاريخ التسجيل : 16/04/2007

مُساهمةموضوع: رد: ديوان (حاجات ياما) للشاعر سعيد شحاتة   29/5/2007, 19:11

مازال بالديوان بعض القصائد
التى سأقوم بكتابتها هنا لاحقا ان شاء الله

_________________
أنا خيلك لما خيول الناس
تهرب م الناس
و أنا فكرة فى راسك
لما الفكر البكر يضيع من سكك الراس
وأنا أحلى بيتين للشعر
اتكتبوا على الكراس

http://saidshehata.blogspot.com/
سعــــــــــــــــــــيد
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://saidshehata.blogspot.com
سعيد شحاتة
مشرف مؤسس
مشرف مؤسس
avatar

ذكر عدد الرسائل : 665
العمر : 39
تاريخ التسجيل : 16/04/2007

مُساهمةموضوع: رد: ديوان (حاجات ياما) للشاعر سعيد شحاتة   31/5/2007, 22:34

10 /مش همدحك
الاهداء /
الى روح الشهيد / محمد حسن طرفاية
__________________
مش همدحك
والحور هناك مستنياك
شايلين مابينهم مطرحك
قايدين شموعهم للفرح
وربيع شبابك يا بطل
قمره انجرح
والورد فوق منك طرح
حمر خدودك وانشرح
ويمامك المفتون وراك بيفسحك
مش همدحك
فارس وكانت كلمتك من مهجتك
والكل عارف سكتك
وطهارة اللقمة الحلال من مخلتك
شايفين براءة ضحكتك
كاتبينها عنوان قصتك
والجنة صارت دولتك
واياك يفكر اى واحد يجرحك
مش همدحك
لو قلت مرة انك بطل
مليون هقول انك ملاك
مديت دراعك تنقذ الناس م الهلاك
وتعود هناك
من غير ما واحد ينصحك
مش همدحك
دا الدنيا لازم كلها تقوم تمدحك
والحور تزوق مطرحك
كنت الامام ووراك جميع المسلمين
والناس بتشهد كل لحظة انك أمين
قول لى بصراحة يا بطل
انت ابن مين ؟؟!!!!!

_________________
أنا خيلك لما خيول الناس
تهرب م الناس
و أنا فكرة فى راسك
لما الفكر البكر يضيع من سكك الراس
وأنا أحلى بيتين للشعر
اتكتبوا على الكراس

http://saidshehata.blogspot.com/
سعــــــــــــــــــــيد
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://saidshehata.blogspot.com
سعيد شحاتة
مشرف مؤسس
مشرف مؤسس
avatar

ذكر عدد الرسائل : 665
العمر : 39
تاريخ التسجيل : 16/04/2007

مُساهمةموضوع: رد: ديوان (حاجات ياما) للشاعر سعيد شحاتة   31/5/2007, 23:13

11/ اتحد
الاهداء
الى د/ رفيق الدياسطى
د/ محمد سعد شحاتة
_______________
شد الفايات
حاول بكل اللى اتبدر
جواك ونبت من أمل
تهرب من الزمن اللى فات
خليك حويط
بحرك ما بيحبش معافر أو عبيط
فإوعك تزرجن مدرتك
وتفتفتك للموج وياخدك للغويط
وحذارى تنسى من الزمن فقرك
وتطلع للذوات
فإبدأ تحرب فى الفايات
واياك تبت
وان كان شاغولك
من زمن نوح البعيد
فزمانه عت
فإنفض غبار قلعك
وحاول تتعدل ع الريح
وتبت ع الشاغول
دمك دا طمى النيل
ماهوش دم المغول
وان كنت عاشق كلمتك
عاند ووجه دفتك
حرر خطاوى المركب الغرقان فى بحر الذكريات
ثبت بعزمك فى الفايات
مش شرط شئ جواك يدق
واضرب عصاتك ع الزبد
فأنت الأحق
وان دمعة الليل سرسبت
فبلاش ترق
خليك فى دربك
واتحد وياك
وكربج فى الزمن
ينشق شق
واطحن بشعرك فى الملل شيلان وزق
خش السبق جواك وحاول تنتصر
وان جذ ضلعك وانكسر
فإوعك تقول العيبة فى الخلفة البنات
دا العيبة رخرخة الفايات
فافتح عصاية دفتك يم الأصيل
خش السبق جواك وحاول تنتصر
ما نتاش عويل
وقف دموعك واتحد
ايدك فى ايد نفسك
وخطط مبتداك
جرب تغنى مع النسيم
لما يداديك غنوة أمل
وافرد فى احلامى الوتر
واستنى بدرك يكتمل
ليلك غلط
لما يكون الفجر من غير سنبلة
صبحك غلط
لما تلاقى الحضن جواه قنبلة
شمسك على ضفيرة حبيبتى كمان غلط
علشان حبيبتى بينفجر جواها بير الأسئلة
ازاى أكون
وازاى أنا
وازاى جدورك مقطوعين مش عندنا ؟؟؟؟؟
واحنا اللى قولنا لك زمان خليك هنا
وافتح وريدك بين وريدى
وخلى عيدك يهجرك ويضمنا
واغرس شرايينك شجر
تطرح طرايح يمنا
اتوضى من بحر العيون
لو يوم هينشف يمنا
أدن فى محرابك
وصلى وأمنا
وافرد جناحك ع القمر
طبطب علينا ولمنا
أصلك بيبدأ م الربيع مش من هناك
فأعقد فاياتك واتحد
وابدأ تشقق مبتداك

_________________
أنا خيلك لما خيول الناس
تهرب م الناس
و أنا فكرة فى راسك
لما الفكر البكر يضيع من سكك الراس
وأنا أحلى بيتين للشعر
اتكتبوا على الكراس

http://saidshehata.blogspot.com/
سعــــــــــــــــــــيد
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://saidshehata.blogspot.com
حسين هاشم
مشرف
مشرف
avatar

عدد الرسائل : 54
تاريخ التسجيل : 22/04/2007

مُساهمةموضوع: مبروك   2/6/2007, 15:25

مبروك أخي سعيد اصدارك الجديد
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
سعيد شحاتة
مشرف مؤسس
مشرف مؤسس
avatar

ذكر عدد الرسائل : 665
العمر : 39
تاريخ التسجيل : 16/04/2007

مُساهمةموضوع: رد: ديوان (حاجات ياما) للشاعر سعيد شحاتة   30/7/2007, 23:31

الله يخليك
ألف شكر لمتابعتك صديقى العزيز

_________________
أنا خيلك لما خيول الناس
تهرب م الناس
و أنا فكرة فى راسك
لما الفكر البكر يضيع من سكك الراس
وأنا أحلى بيتين للشعر
اتكتبوا على الكراس

http://saidshehata.blogspot.com/
سعــــــــــــــــــــيد
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://saidshehata.blogspot.com
محمد سلطان
مشرف
مشرف
avatar

عدد الرسائل : 159
تاريخ التسجيل : 18/04/2007

مُساهمةموضوع: رد: ديوان (حاجات ياما) للشاعر سعيد شحاتة   25/8/2007, 11:41

عقبال ما نهنئك على ( سمراء والرحمة ) يأبو السعود
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
سعيد شحاتة
مشرف مؤسس
مشرف مؤسس
avatar

ذكر عدد الرسائل : 665
العمر : 39
تاريخ التسجيل : 16/04/2007

مُساهمةموضوع: رد: ديوان (حاجات ياما) للشاعر سعيد شحاتة   25/8/2007, 21:55

يارب
ان شاء الله

_________________
أنا خيلك لما خيول الناس
تهرب م الناس
و أنا فكرة فى راسك
لما الفكر البكر يضيع من سكك الراس
وأنا أحلى بيتين للشعر
اتكتبوا على الكراس

http://saidshehata.blogspot.com/
سعــــــــــــــــــــيد
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://saidshehata.blogspot.com
 
ديوان (حاجات ياما) للشاعر سعيد شحاتة
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
الأولمـــــــــــــــــــــــــــــــــــــب :: المستشفى :: عنبر الإصدارات الشعرية-
انتقل الى: