الشاعر اللبناني طلال حيدر
بغيبتك نزل الشتي قومي طلعي عالبال
في فوق سجادة صلا واللي عم بيصلوا قلال
صوتن متل مصر المرا وبعلبك الرجال
ع كتر ماطلع العشب بيناتنا بيرعى الغزال
وديت مع راعي حماه يشفلي الطقس شمال
قلي السني جاي هوا بيوقع الخيال
ياريت ماسرجت الفرس ولا بعت هالمرسال
الله...الله
بتلبقلك المي لاتموتي اغرقي بالمي
تيصير موتك نعس وتصير شسمك فيء
وجهك جنازة والملك مقتول والعسكر قبالي
في ناس عم بيحاربوا بقصر الملك وفي ناس ع العالي
خوفي عليكي تكبري وخوفي على حالي
رح تنزل علي الدني ويتغرق خيالي
وإن كان لابد وغنى ورح ترحلو محوو الطريق
مرسوم على الحيطان ولد حفيان راكب بالحريق
قومي نعسيلوا يادني بلكي اذا نعستي بيفيق
يااللي نطرتوا رجع طلع الصبح صبحين
شميت ريحة (علي) قالوا مرق الحسين
جيبوا بيارق كربلا وسماع منها أه
فردوا البيارق بالهوا قال الهوا الله
افتحلي درفتين الهاء
وخلي الهوا يختم ألف باء الهوا بالهاء
وجهك أدان الصبح والفاتحة اسمك
والتاء المربوطة شريطة على رسمك
وبتقول خبيني
ولك بخبيك مابين الحمد والفاتحة بغطيك بالرحمن
من بعد مابإيدو رفع للمي بكربلا تيشرب العطشان
قاللا له لمي نزلي من سورة الرحمن.
17/7/2007, 00:45