خمسة مارس شعر / سعيد شحاتة

خمسة مارس
شعر / سعيد حامد شحاتة
-------------------------------
كل دا من أجل ثورة خمسة مارس
جمعوا كل الفوارس
واتفرط خيط القضية
وابتدى الجرس اللى متعلق على دماغ الكنيسة يدق جامد
عم حامد كان على المدنة الطويلة
والسكوت سلطان على عرش البيلة
والحروف بتهز فى الكلمة القتيلة
يا قصيدة هزيلة بتزلزل جدانا
دارنا من غير مشربية
وأمى قاعدة تقول فى بالها بصوت ضعيف
(( يادى الأذية ))
جمعوا كل الفوارس ؟
يعنى يا أمه الثورة كات قامت فى مارس؟
واللا كات قامت على مر التاريخ فى الأصل ثورة
الحكاية كلها كانت مناورة وفلسفوها
صدقى ما تصدقيش ملعون أبوها
المدينة أم الوريد ضيق وعتمة
المدينة أم الزنازن كلها براغيت وكتمة
لسه أول شتمة تطلع من لسانى
نفسى أفوق وأرجع وراكم
وأتعدل وأقرانى تانى
لموا عنوانى المبعتر ع الخريطة
والحقوا الغنم اللى ماشى ف جرة الدبة العبيطة
الديابة بتعوى فى الأرض الغويطة
والسكك فى آخرها حيطة وباب موارب
والمدى مليان ديدان وفران وأسفلت وعقارب
والتاريخ قارب غريق نعسان على صدر الحقيقة
والحياة متقاسة زى الأرض لكن بالدقيقة
والدقيقة بتجرى زى حمار حصاوى
أصلى من كم ليلة فاتت
كنت بسمع قلب ستى وهوا بيرص الحكاوى
الحكاية الأولى حدوتة عريجة وكلب خالى
والحكاية التانية عن سيرة الضلالى ابن الضلالى
والحكاية التالتة عن خضرة وعن رزق الهلالى
والحكاية الرابعة بياع المقالى
حاله كان يشبه لحالى وكان فتوة
كان عليه زند وعليه حبة مروة
كان يقول ان الحقايق عايزة قوة
عايزة قوة واد يكون زى الرصاصة
لا يهمه السيف ولا كلب الحراسة
واد يدوس ع الصعب ويخطى الحفاير
وأما ييجى يموت يموت والدم فاير
واحتفال الثورة لو كان خمسة مارس
نرفع الشعارات مع بداية يناير
عاير الأحزان على ميزان الوقية
واخلع الطربوش ودهوس ع الطاقية
والعن الطبقة الشقية ف كل آية
عاش عدو العرش يا ولاد السبايا
عاش نصير الشعب مات كلب الحماية
ارفعوا الشعارات على أيتها راية
وافضحوا أم الحكاية
الحكاية الطين على ولادالغلابة
للديابة نياب وللأوجاع مخالب
اخبطوا الشاعر بقبقاب أو بقالب
واسقوا ميتين أمه أمرار المقالب
الحساب سالب فى سالب والنتيجة حمار وقطة
العبيط ابن العبيط بيحط خطة
والمحطة الجاية عايزة قلوب حديدة
كلبنا عمال بينبح جنب بوابته الجديدة
ستى دايرة ترص فى ودانى الحكايات السعيدة
القزاز عمال يخبط
قطر ريح شباكنا بيهبط برقة
الغزية الساكنة فى بداية البلد عايزالها دقة
كل أفكار الدماغ محتاجة زقة
بقة بنت لذينة لازقة ف جلد ايدى
سيدى كان ريس وكان شغال براسه
عم حامد جاب ولد عارف خلاصه
فاسه كف الايد وزنده البندقية
بس مخنوق م الكلاب البندرية
واللى ساحبين الكلاب البندرية
واللى ساندين اللى ساحبين الكلاب البندرية
واللى أعلى من اللى ساندين اللى ساحبين الكلاب البندرية
واللى بيحبوا اللى أعلى من اللى ساندين اللى ساحبين الكلاب البندرية
ابنه مخنوق م الحكايات المريضة المتدارية
والنفاق اللى اتكتب ع الناس فريضة و مأمورية
والهدوم اللازقة ع الجتت العريضة البربرية
ابنه مخنوق من غفير الليل وطبال الغزية
ابنه مخنوق من تفاصيل القضية
من خيوط العتمة ف عيون الصبية
اللابسة كرباج القصيدة الأمريكانى
م المبانى العالية وسكوت المبانى
م الكلام أبو طعم حامض ع الصوانى
عم حامد كان مالوش ع الحافة تانى
خدنى ودانى الكتاتيب القديمة
وأما وكلنى المدمس
كان مشربنى الشتيمة

شعر / سعيد حامد شحاتة