]شطرنج **** شعر / سعيد حامد شحاتة ****
ــــــــــــــــــــــــــــــــــــــــــــــــــــ
تلعب شطرنج
هلعب وياك من غير طابية
وهراهن على عيشى الناشف ..
...والعطش الساكن فى الخابية
هلعب وياك بوزير موجوع
وملك خايف يمشى لقدام ليموت م الجوع
وحصان مكسور ........
.......وعساكر خايفة تنط السور
وفـــــــــــــــــــــــــيلين منـــــــــــــــــــــــاحيس
هبدأ بالتحسيس على راسى ف أول لعبة ...
.....صدق صعبة!!!!!
انى أضحك للبنت اللى وراك
وأديها معاد
وأقرا الجورنان ....
....وأشرب كباية الشاى الباردة
وأسلم ع الناس الماشيين
وأنت مركز!!!!!
عمال بتفكر (( ف))وزيرى اللى بيتعكز
نفسك تقتل ملكى الدايخ ..
....وتصدق ياد لعبك بايخ
طمعان ف الفيل المتعافى .
... وبتضرب ف الفرس الحافى
وبترسم على عيشى الناشف
... والعطش الساكن فى الخابية
طاب دأنا بلعب من غير طابية!!!!!
وعساكرى كما العصافير (( ع )) التوت ..
.. وأنت الصياد
وولاد الحى بيستنوا الغالب فينا
رغم ان الليل فارد كفينو على المينا
والنوم بيعشش جوا الروس
والبوص جواه صرصار الغيط بيصفر لشيطان السكة
وايديك عمالة بتتاخر
وايديا بترسم ع الدكة ف زلومة الفيل
والخيل دايرة بترمح ترمح
ووزيرى الغالى بيتصرمح ريح من طوابيك
وأنا تايه فيك ..
..وأنت بتشتم على طعم الشاى
عمال بتفكر فى حصانى
ونفسك تعرف هيموت ازاى
وايدين الناس دايرة تشاور
وعنيك بتحاور صاحب الناى اللى بيتبصص ع الساحة
لسة الوقت طويل قدامنا ..
. وأنا عايزك تلعب بالراحة
ملكك كاشش ..
.. ووزيرك ميت من ساعة
ادينى سيجارة وولاعة .
...رقيلى العسكرى بالطابية
قدملى وزيرى على حصانى
ملكك قدامه تلات خطوات
أدى واحد.......
اتنين ....
تلعب تانى ؟؟؟؟؟
ــــــــــــــــــــــــــــــــــــــــــــــــــــــــــ
شعر / سعيد حامد شحاتة 
18/5/2007, 21:55
