العيد عدى
وعنيك يا ياسين لسه بتحلم (( ببهيه وبحروب الردة
بالفرح اللى بيضحك للناس وقت الشدة
العيد عدى
وعنيك لاسه بتحلم بالنور
بالورد المالى جيوب الدور
بالبنت بدور اللى حبيبها اتعازم ووقف للدبابة
بسطور مليانة كلام كداب تحت العناوين الكدابة
لسه بتحلم بالعنابة اللى بتطرح ورد
عنابة قلبك ياد يا ياسين نشفت م البرد
والأرض ما هياش نفس الأرض الطراحة
لسة بتحلم وسط النعناع بالبنت السمرا الفلاحة
بخدود التفاحة اللى بتفتح خط النار
بالبيت والغيط والزير والبير
والحلل الصاحية على الكوانير فى زوايا الدار
ببهانة اللى بتشطح فى الزار
بهزار لولاد ساعة الفسحة
لسه بتحلم بالعيش والخيش والناف والمنجل والمسحة
بالكلمة اللى هتبدأ تصحى ف صوتى وصوتك
بالحرب الدايرة عشان قوتى وعلشان قوتك
بالريح العمالة بتبدر بذرة موتك جوة اللجران
لحظة ما بتزرع فدان قلبك بالحنة
لسة بتسألنى الجنة لمين ؟
الجنة لأصحاب الجنة
والنار لولاد الكلب الدون
لو نفسك توصل يم هناك اعمل مجنون
اعمل درويش
البس زى الحرافيش بالظبط
ابدأ بالربط ما بين وشك ووشوش الناس
اضحك غصبن عنك بشويش للسكة ولكلاب الحراس
وان داس فوق راسك ديب خحواف خن وطاطى
واتمنى الموت على ايد ناسك
أحسن ما تموت يا ياسين فى العيد
على ايد الواطى ابن الواطى
سعـــــــــــــــــــــــــــــــــــــــــــــــــــــــــــــــــــــــيد
20/4/2007, 14:02
