حاجات يامه

موضوع: حاجات يامه 16/4/2007, 13:26

بنتغرب
وحضن الشمس يتدارى ف خطاوينا
ونتقابل
نبص لبعضنا حبة ونتصعب
عشان كدبة قالوها اتنين ما عشقوش بعض زيينا
وأعيش فاكرك
وراسم بين رموش العين ملامح كدبة هدامة
وتنسينى برغم انك ما زلتى بتعشقى فيا حاجات يامه
كلام الشعر والتنكيت وغنوة تمللى أغنيها لثومة ف فيلم سلامة
حاجات يامة
سجايرى الفرط لما أكتب نكت سكة
وضحكك لما بستأذن ولما تقولى رايح فين وأقول هفتح بلاد عكا
وجيبى اللى اتزرع جواه شوية قرشينات فكة
وقلبى اللى اترسم بسمك على الحيطة وع الدكة
وضحكة تمللى أطلعها وأخبيها
وأخاف يسرقها ديب واقف بيسرق ضحكة العشاق على السكة
وشخبطتى على الكلمة
وخوفنا من الفيران فى الغيط ومن حواديتنا فى الضلمة
ومن شكى ما بين الرسم جوا ملامحك النيلى وبين لونى
ومن بصة عنيكى السودا لعيونى
وتنهيدك وتنهيدى
ووقفة شعرى لحظة ايدك المرمر ..
..ما تلمس ف الهوا ايدى
وهزة شفتى يمك
وهزة شفتك يمى ولا همك
كلام الناس هيجرحنا ..هيدبحنا ..
.تقولى ان أنتى شريانى وأنا دمك
ومش بدرى ولا بتدرى
ورعشة جسمى لما يمروا كفينك على صدرى
ونتكلم كلام يمكن ما نفهمهوش
وكلمة تجر ميت حدوتة وحكاية
وأنا بين النجوم والورد تايه فيكى يا آية
ومحتار فى السنين بالطول
ودايخ فى الساعات بالعرض
وأقيم لك فى الصلا يمكن
تؤمينى ...تضمينى ...
تخلينى أحس ان الصلا (ف) حضنك عليا فرض
وبسأل نفسى معقوله تكونى زينا (م ) الأرض ؟
ولو كنتى
سمانا دى سما لينا ولكن فوق ضفيرتينك سما وبجد
تايه فيكى يا آية
سمانا دى عشان خاطرك سما مراية
وأنام حبة تهزينى
أفوق ماسك كتاب فى الشعر والتانى كتاب دينى
وقدامنا كتاب صاحبه ما هوش عارف
يفرق يعنى ايه عالمة وعلامة
ونقراه ننفجر (م )الضحك أحس انك
ما زلتى بتعشقى فيا حاجات يامه
تبصيلى ونتنهد ...ونتكى على ايدينا
تتوهى ف حضنى أتوه فيكى ونتدارى ف بعضينا

موضوع: رد: حاجات يامه 16/4/2007, 23:44

كلام الشعر والتنكيت وغنوة تمللى أغنيها لثومة ف فيلم سلامة
حاجات يامة
سجايرى الفرط لما أكتب نكت سكة
وضحكك لما بستأذن ولما تقولى رايح فين وأقول هفتح بلاد عكا
وجيبى اللى اتزرع جواه شوية قرشينات فكة
وقلبى اللى اترسم بسمك على الحيطة وع الدكة
وضحكة تمللى أطلعها وأخبيها
وأخاف يسرقها ديب واقف بيسرق ضحكة العشاق على السكة
وشخبطتى على الكلمة
وخوفنا من الفيران فى الغيط ومن حواديتنا فى الضلمة
ومن شكى ما بين الرسم جوا ملامحك النيلى وبين لونى
ومن بصة عنيكى السودا لعيونى
وتنهيدك وتنهيدى
ووقفة شعرى لحظة ايدك المرمر ..

شحاتة

ستغار الفصحى منك .. تذكرني بفؤاد نجم .. أكاد أقول أنك هو .. التقاط ممتاز للتفاصيل العادية و بقدرة منك جعلتها مربكة

لا تغب .. مودتي

موضوع: رد: حاجات يامه 18/4/2007, 10:28

كعادتك والله متألق يا أخى سعيد
كلمات رائعة

موضوع: رد: حاجات يامه 19/4/2007, 15:35

ومش بدرى ولا بتدرى
ورعشة جسمى لما يمروا كفينك على صدرى
ونتكلم كلام يمكن ما نفهمهوش
وكلمة تجر ميت حدوتة وحكاية
وأنا بين النجوم والورد تايه فيكى يا آية
الاستاذ الفنان سعيد شحاتة اهنيك على براعتك الفذة فى جعل القارىء يتخيل وللوهلة الاولى انه البطل الاوحد للقصيدة ولكن سرعان ما يفيق ريقر ويعترف انه لابد ان يتلاشى ويختفى ليظهر البطل الحقيقى ( سعيد شحاتة ) احييك على على ذكاءك الفنى مع انتظار حار للقصيدة القادمة

موضوع: رد: حاجات يامه 20/4/2007, 14:03

يابو السعود يا جامد

شكرا اخ حابى دايما مبدع والابداع غيتك

سؤال ..
مين اللى عرفك ان انا باشرب سجاير فرط؟؟؟!!!!

اخوك الصغير
بيسوو

موضوع: رد: حاجات يامه 20/4/2007, 22:22

سعيد

تعلم تماما أنني من عشاق هذه القصيدة فهي رائعة فيها بكارة الصورة وعفوية العاشق المتوحد بمن يحب في حلول حلاجي آخى بين جمال لغتك العامية وبين صوفية العشاق الكبار
دمت مبدعا

موضوع: رد: حاجات يامه 26/4/2007, 17:18

أشكر هذه العاطفة المتبادلة بيننا والتى جمعتنا على قلب واحد
قلب الشعر الكبير
أنتم وأنا ان شاء الله على طريق سليم وسنظل هكذا مهما كانت الظروف
فقط لأننا نعرف أنفسنا جيدا
نعرف النسب لهذا الطين المقدس
الطين العربى
تحياتى
المحب دائما مهما كانت الظروف محب دائما

موضوع: رد: حاجات يامه 25/6/2007, 23:49

اذا كنت انت سعيد ف الشعر اسعد منك بييييك
الله عليك يا شاعر ياللى بتمد ايدك جوه كل قلب طيب وبتكتب بداله احساسه
تسلم يا غالى

موضوع: رد: حاجات يامه 27/6/2007, 14:44

تسلم يا صلاح

أشكر ردك الجميل