دولا مين ودولا مين
دولا عساكر مصريين
دولا مين ودولا مين
دولا ولاد الفلاحين
***
دولا الورد الحر البلدي
يصحى يفتح اصحى يا بلدي
دولا خلاصة مصر يا ولدي
دولا عيون المصريين
دولا مين ودولا مين
***
دولا القوة ودولا العز
دول راضعين من أطهر بز
هز يا هلال هلالك هز
واحنا وراك ملايين جايين
دولا مين ودولا مين
***
دولا اخواتنا ودولا بنينا
دولا الأمل اللي مخلينا
دولا المجد اللي مخلينا
فوق الجرح نعود سالمين
دولا مين ودولا مين
***
دولا يا سينا ولاد الشهدا
دولا التار لا ينام ولا يهدا
خلي ترابك يسكن يهدا
ويضم الشهدا الجايين
دولا مين ودولا مين
همَ مين واحنا مين
همَ مين واحنا مين
هم الأمرا والسلاطين
هم المال والحكم معاهم
واحنا فقراء ومحكومين
حزر, فزر شغل مخك
شوف مين فينا بيحكم مين
احنا مين وهم مين
احنا الفُعَلا البنايين
احنا السنة واحنا الفرض
احنا الناس بالطول والعرض
من عافيتنا تقوم الأرض
وعرقنا يخضر البساتين
حزر, فزر شغل مخك
شوف مين فينا بيخدم مين
هم مين واحنا مين
هم الأمرا والسلاطين
هم الفيلا والعربية
والنساوين المتنقية… طبعاً,
حيوانات استهلاكية
شغلتهم حشو المصارين
حزر فزر شغل مخك
شوف مين فينا بيأكل مين
احنا مين وهم مين
احنا قرنفل على ياسمين
احنا الحرب حطبها ونارها
احنا الجيش اللي يحررها
احنا الشهداء فِ كل مدارها
منتصرين أو منكسرين
حزر فزر شغل مخك
شوف مين فينا بيقتل مين
هم مين واحنا مين
هم الأمرا والسلاطين
مناظر بالمزيكة
والزفة وشغل البولوتيكا
ودماغهم طبعاً استيكة
بس البركة في النياشين
حزر فزر شغل مخك
شوف مين فينا بيخدع مين
هم مين واحنا مين
هم الأمرا والسلاطين
هم بيلبسوا آخر موضة
واحنا بنسكن سبعة في أوضة
هم بياكلوا حمام وفراخ
واحنا الفول دوّخنا وداخ
هم بيمشوا بطيارات
واحنا نموت في الأوتوبيسات
هم حياتهم تمضى جميلة
هم فصيلة واحنا فصيلة
حادي يا بادي يا عبد الهادي
راح تفهم قصد الغنوة دي
لمّا الشعب يقوم وينادي
يا احنا يا هم في الدنيا دي…
حزر فزر شغل مخك
شوف مين فينا حيغلب مين!!!
شُرُم بُرُم
29/5/2007, 18:03
