[size=18][center]
القصيدة مهداه لكل أعضاء الأولمب
أرجو من الله أن نجتمع على كلمة الابداع للابداع لا للخلافات الشخصية
____________________________________
حلم من رابعة ابتدائى
___________
يا وريد الحلم يا ممدد على صدر الأغانى
غايبة عن راسى المعانى
نفسى أغنى لك على المليون وتر..... مليون قصيدة
بس أحلام الطفولة معذبانى
يا وريد الحلم يا ممدد على صدر الأغانى
_ _ _ _ _ _
طعم وش النيل بيطرح ع المداين
والسلام اللى اتولد بينى وبينك
انى ما أرميش ايدى فوق من كتف خاين
وأزرع الحنضل على أبواب الجناين
السلام اللى اتولد بينى وبينك
انى ألون وش بكرة بلون سمايا
وازرع الكلمة على تراب الوطن __ وأحصدها آية
وأرسم الضحكة على جبين الحزانى
وأطبع الراية على وشوش الضحايا
السلام اللى اتولد بينى وبينك
نـــــــــــــــــــــور وضلــــــــــــــمة
السلام مش بس كلمة
السلام مش ضحكة فوق من وش عالمة
السلام عــــــــــــــــــــــــــالم ومدنة
واد فى ريح القوة عارف .... يعنى ايه كلمة بلدنا
يعنى ايه ضحكة ولادنا ( ف ) جو هادى
يعنى ايه النيل بيدن .... والهرم بيقول بلادى
يعنى ايه الفرح عادى .... ويعنى ايه الضحك عادى
يعنى ايه مد الأيادى ويعنى ايه شكل والمساعدة
يعنى ايه ( حامد ) و ( مينا ) و ســــــــــــــيدة
و ( بطرس ) و سعـــــــــــــــــــدة
يعنى ايه المعدة شغالة بسلاسة
والدماغ مليان كياسة
يعنى ايه الفرق بين الدين وأوجاع السياسة
تبقى حســــــــــــــــــــــــاسة الملامح
تبقى أجمل كلمة داست ( ع ) اللسان انك مسامح
وان طعم النــــــــــــــــــــيل فى حلقك
زى طعم النيل فى جوف بطرس ومينا
وان كل اللى ابتدوا فى السر كانوا ولاد لذينه
وان أنا وأنت فى سفينة ...مشرقة بشراع و دفة
والقلوع علشان تطول الشمس مش محتاجة لفة
القلوع عـــــــــــــــــــــــــايزة التأنى
عايزة واد فنان يغنى بصوت سماوى
القلوع مش عايزة حاوى
والطريق فى البحر مش محتاج مخاوى
الطريق عايز مداوى .... يشغل المعدة بسلاسة
الطريق عايز جدع يفصل بين الدين والسياسة
صوت يعرفنى التطرف ( م ) الحماسة
صوت يتوهنى على شطوط النشيد
صوت جديد
صوت يقول لى ان( السلام زاحف أكيد)
جاى بتوب أخضر .... وسحنة واد فدائى
مش ببومته وغصنه وشعاره البدائى
السلام زاحف أكيد؟؟؟؟؟
حاجة بحلم بيها من رابعة ابتدائى
_______________
شعر / سعيد حامد شحاتة
8/8/2007, 22:59
