إحنا عشاق الحياة
طاهر البرنبالي
كل يوم تقرب جراحتي.. أعْرفك أكتر براحتي
واسكن الإحساس بقلبك وبشباب النبض فيكي
وأمّا روحي تخاف وتشهق.. من عيوني بتداديكي
أسمع التنهيده نار.. والمس الأحلام هيام
قلبي داق الإختيار واترمي في حمي الجراح
واللي راح م العمر راح كان بيتمني يلاقيكي
آه يا أوراق النهار والندي نازل عليكي
أكّدت لي محنتي قلبك خضار
خطوه مني، خطوه منك اعترافنا صار فنار
دي الحقيقه اللي عارفها
وبضمير النور شايفها
والجناح عمال يرفرف كان دليل الانتصار
هو قلبي ولا قلبك محتاجين «دار الفؤاد»
الحكايه يا حبيبتي مش نسيج محتاج نسيج
أو كلام يشعل مشاعري.. يصحي خيل الليل يهيج
الحكايه مش مساومه أو مزاد
إنتي قربتي بعواطفك واتحدف شال الحنان..
فوق كتافي ف لحظه فاصله
قلبك العطشان نده لي للمواصله
كنت ليه ساكت يا قلبي ع الجنان
كان من المفروض جنونك من زمان
...
...
وأمّا صوتك بيلاعبني تقولي فايق
بعد ما تهدا الجراح تشتعل تاني الحرايق
يا حبيبتي صدقيني..
قلبي محتاج النعومه والأمومه والحنان
قبي أوتار الكمان عايش عشانك..
أو عشان عزفه المباشر له مكان..
يروي عطشك واحتياجك للأمان
خطوه خطوه انصهرنا.. إحنا عشاق الحياه
إنتي مديتي بوعودك حبل واصل للنجاه
وبكلامك عن وجودك بنت روحي
طابت الآلام في نفسي وف جروحي
قمت شاعر .. م الهموم والمآسي والغيوم
قمت أنفض رقدتي وانتُر مواجعي
إمسكي الورقه وراجعي
كل كلمه همستها ف ودنك حقيقه مش كلام
مش ملاوعه أو هدف تافه وخدعه
كل كلمه همستها ف ودنك مشاعري
مش سراب أوهام وبدعه
ما انتي أكبر وانتي أوعي
وبمشاعرك تمسكي طرف اللجام
قلبي ليه جواكي هام
....
....
إنتي شلاّل الغرام اللي غرّق جرحي طيبه
واللي خلاّني النهارده أكتبك أجمل حبيبه
واحضنك مع إن جرحي لسه طازه
وامّا انام ما اعرفش اغمّض
وامّا اغمض في المنام أحلم واشوفك
أعشق الرغبه ف شفايفك
وامسك الحلم بكفوفك
يا حبيبتي يا جميله ليه كسوفك
إحنا قلنا ما فيش ما بينا أي داعي
للحرج من نور مشاعري واندفاعي
عُمله واحده الحب وانتي يا حبيبتي
ليه بقي خجلك ياروحي
إنتي ناسيه إنك انتي وردتي وغاية طموحي
وللا ناسيه إني شاعر قد قوله
لو طلبتي النجم عالي رايح اطوله
واقطفه في البعد زهره من سماه
لاجل عين السحر فيكي ترضي عني
قلبي يشبع بيكي عمره..
طول ما نبضه في الحياه
طول ما نبضه في الحياه..
13/8/2007, 22:40
