وقال من فن الواو
عبد الستار سليم
أبدى بمديحى فى «طه»
سيد «ربيعة» و «غالب»
طبع الخلايق خطاها
وتتوب والطبع عالب
وامدح فى سيرة نبى زين
ضمن الغزالة وجارها(1)
الدنيا دن بنبيذين
تِسكر إذا فُت جارها
وامدح نبينا المشفع
فى الناس يوم القيامه
دنيا بلا دين ما تنفع
ضحكت على الخلق ياما
يا رايح الحج بالله
بوس لى تراب المدينه
والقبر بالدمع بِلاّه(2)
قول له يا «طه» نادينا
يا اهل الحجاز اندهولى
وادعولى يوعدنى سيدى
وارمى فى مكة حمولى
من زمزم اشرب بإيدى
زوقت بيتى وقبيته
نده «الحرم» جيته باكى
يا كعبة الله فى بيته
علقت قلبى بتوباكى(3)
لما بـ «طه» انشغلنا
حنينا .. والسكة حنت
والحر من فرحه غنى
وبواخر البحر غنت
نوره على الدرب باين
فوق الجبل والتلالى(4)
وعلى الخلا .. والمداين
أنوار نبينا تلالى
دمعى من العين سرسب
لما شافت العين نوره
حب النبى لينا مكسب
يا بخت من جا .. يزوره
بحترت قلبى و لـمُّوه
لما شافو قلبى مبحتر
والطفل سيبته لموه(5)
حب النبى فــ قلبى أكتر
جينا وسبنا المنازل
والدنيا دى فضِّناها
حلف اللى راكب ما نازل
إلا .. حدا .. قبر «طه»
لما خدت حبك منابى
سهلت عليا المساعى
يا ابدا من امى ومنابى(6)
جيت لك على الكعب ساعى
ألوفات تسبقها ألوفات
رايحه تزور «التهامى»
توقف وتدعى .. فى «عرفات»
يارب تحسن ختامى
نور «التهامى» وصل لى
والناس بيه استجاروا
ع الزين أسلم واصلى
واتمنى أسكن فى جاره
يا نسمة الطيب هلى
يا ساحة النور بانى
أنا سبت دارى وهِلى(7)
نورك يا «طه» سبانى
يارب جاى لك ملبى
محرم تركت المظاهر
إن مت يرحمنى ربى
ون عدت رجعنى طاهر
أمدح نبينا المظلل
- فين مامشى - بالغمامة
هو اللى ع الدين دلل
بالمعجزة والكرامة
آية ما حدّن(8) حصاها
ولا نال حاصى مراما(9)
الجذع حن وحصاها
سبح فى كف «ابن رامة»(10)
أول ما هلت ميدنته(11)
الكون دقت طبوله
الكون مش هو .. دانتو
ياللى دعاكم رسوله
محرم وبيضا تيابى
والقلب ع الذنب نادم
يارب تقبل تيابى(12)
وارجع لأصلى بنادم(13)
هوامش :
(1) أجارها (2) بلله بالدمع (3) بتوبك (4) التلال (5) لأمه (6) ومن أبى (7) وأهلى (8) ما أحد (9) مرامه (10) لقب الرسول(#) (11) مئذنته (12) توبتى (13) بنى آدم
4/12/2007, 21:01