مزاد

قرب قرب
وتعالى وجرّب
أول بيع بنى آدم فى العصر الحالى
الباب مفتوح
والصوت مبحوح
ووطن مدبوح ياللى ف بالى
مين عايز ييجى يقف ويبيع
ويدوق اللحمة العجّالى؟
الواقفة بلاش
والفرجة بلاش
بس اضحك واضحاك بالعالى
قرب قرب
سقّف جامد
( صدّام ) فى القفص اللى قبالى
وشوالى الخضرة ف كل مكان
أفراح مزروعة ف ريح أحزان
ووجع انسان وغناوى شيطان
ريح بعض ف كراتين ومخالى
والبيع فى جنينة البيت لبيض
تحت رايات الوطن الغالى
وعلالى الكلمة على الأسماع
ويا كل بتاعة وكل بتاع
صدام للبيع قولوا ان شا الله
قرب قرب
سقف يا الله
افرحى يا مائير
واضحك يا كوهين
وتعالى وبص يا عبد الله
ألدونا ودوه على ألدونا
بنبيع صدام
بصينية قديمة
قزازة قديمة
نحاسة قديمة
وعلبة كبريت وصابونة
ألدونا ودوه على ألدونا
وعليه كرفتة وببيونة
ويا مزاد يا مزاد
زرغتوا يا بنات
سقفوا يا ولاد
دى الكلمة الطالّة ماهيش ردة
..........
صدام للبيع
بدراع مفتول
وودان تتحدى ودان الغول
وسنان بتقرقش أجدع فول
ودماغ دخله برومة وصدّى
قرب قرب
لمزاد العطا فيه برطوشتين
وريال فضة
وتعالى وعاين عرضه وطوله
على الفرازة وباللندة
ولا شغل دجل ولا ألابندا
صدام بشناب
وضروس ونياب
وضوافر زى أسود الغاب
وكتاب مفتوح للى محوّد
مين فاصل ؟
مين قال هيزوّد؟
بريال من غير البرطوشتين
شتاشر ساغ
ولا جانى لا تأشيرة ولا بلاغ
والحنش اللدّاغ متقيد
تعا قرّب خد واحد سيد
واكسب سخان
واسمع تعليق سيدنا السلطان
صدام خاين
والخاين فى الدستور يتباع بالألمونيا
وأهو دا الدستور المطّبق
على شعبى وعلى ناس سكسونيا
صدامهم خان
والفجر ان حاول مرّة يبان
فى بلاده اطفوه
وإن واحد مد دماغه هاتوه
نعرضه للبيع ريح من صدام
وتعدّوا العام وتجيبوا العام
وان عام على وش الميّه غلام
اغرزوا فى دماغه سنانى العاج
أنا أصلى خليفة الله فى الكون
وأمرنى انى احكم بالكرباج
لا تاخدكم رأفة بطفل وشيخ
ولا منبوذة
ولا ست كبيرة ولا عجوزة
ولا حد يحاول يعمل بوذا ولا الحلاج
أنا أصلى خليفة الله فى الكون
وأمرنى انى أحكم بالكرباج
فى معيز ونعاج عمّالة بترمح فى الملكوت
والأسد المتعافى الصدام
واقف قدامى كما الكتكوت
.........
ألدونا ودوه على ألدونا
وخدونا عبيد فى بيوت أبونا
وحراس للبير
والوجع الساكن جوّا وريد الكلمة
قاسوه بالمتر وبالأمبير
ولا حدش مد دماغه وقام
ولا حدش أعلن أول كلمة لموته وصام
ولا حدش عام للبر التانى
يشوف صدام معروض للناس
ولا لابس سلطانه يغطيه ولا ملكه مداس
والايد الفاس
عمالة بتكتب بالاخلاص
على باب القفص المتعرى
صدام للبيع !!!!!
وربيع الأمة جليد
ولسان الحق
حصان متلجم بالنبوت
وكلاب بتعيش
وأسود بتموت
وتابوت الصبر
بيحضن كل بدن رماح
والأسد ان مات على ايد خاين
ف دا كلب وراح
وصباح غامق على أرض براح مليانة نعاج
الحكم الأعظم قال صدام
وهدوّر على قبر (الحجاج )